اسلام آباد کچہری خودکش حملہ: حملہ آور کا ہدف پولیس گاڑی تھی، محسن نقوی

اسلام آباد: وفاقی وزیر داخلہ محسن نقوی نے کہا ہے کہ اسلام آباد کچہری کے باہر ہونے والا خودکش حملہ دوپہر 12 بج کر 39 منٹ پر کیا گیا۔
انہوں نے بتایا کہ حملہ آور نے کچہری میں گھسنے کی کوشش کی جو سیکیورٹی اہلکاروں نے ناکام بنا دی، جس کے بعد اس نے پولیس کی گاڑی کو نشانہ بنایا۔
وزیر داخلہ کے مطابق خودکش حملے میں 12 افراد جاں بحق اور 27 زخمی ہوئے جبکہ جاں بحق افراد کی شناخت کا عمل جاری ہے۔
محسن نقوی نے جائے وقوعہ پر ریسکیو سرگرمیوں کا جائزہ لیا اور زخمیوں کے بہترین علاج کی ہدایات جاری کیں۔
انہوں نے کہا کہ دہشت گردوں اور ان کے سہولت کاروں کو انجام تک پہنچایا جائے گا، شواہد اکٹھے کر لیے گئے ہیں اور جلد حقائق قوم کے سامنے لائے جائیں گے۔