سینیٹ سے منظوری کے بعد 27ویں آئینی ترمیم آج قومی اسمبلی میں پیش کی جائے گی

اسلام آباد: سینیٹ سے منظوری کے بعد 27ویں آئینی ترمیم کا بل آج قومی اسمبلی میں بھی پیش کیا جائے گا۔
قومی اسمبلی سیکریٹریٹ نے اجلاس کا ایجنڈا جاری کردیا ہے، جس کے مطابق وزیرِ قانون ایوان زیریں میں 27ویں آئینی ترمیم کو زیرِ غور لانے اور فوری منظوری کی تحریک پیش کریں گے۔

واضح رہے کہ گزشتہ روز سینیٹ نے 27ویں آئینی ترمیم 64 اراکین کی حمایت سے منظور کی۔

ترمیم کے ذریعے آئین کے آرٹیکل 243 میں بھی اہم اصلاحات متعارف کرائی گئی ہیں، جن کے تحت ملکی دفاع اور فوجی قیادت کے ڈھانچے میں نمایاں تبدیلیاں کی گئی ہیں جبکہ سپریم کورٹ کا ازخود نوٹس کا اختیار ختم ہوگا اور وفاقی آئینی عدالت قائم کی جائے گی۔ اس عدالت پر سپریم کورٹ کے فیصلوں کا اطلاق نہیں ہوگا جبکہ ججز کی اہلیت، تقرری اور جوڈیشل کمیشن کی تشکیلِ نو سے متعلق شرائط بھی طے کی گئی ہیں۔

قومی اسمبلی سے منظوری کے بعد صدرِ مملکت کی توثیق پر 27ویں آئینی ترمیم فوری طور پر نافذالعمل ہوجائے گی۔

دوسری جانب ایجنڈے میں سائبر کرائم میں 35 فیصد اضافے سے متعلق توجہ دلاؤ نوٹس، شہریوں کے واٹس ایپ اور حساس معلومات کی ہیکنگ کے معاملات بھی شامل ہیں۔