بھارت میں نیپا وائرس کے خدشے پر پاکستان میں ہائی الرٹ، کلیئرنس کے بغیر داخلہ بند

بھارت میں نیپا وائرس کے پھیلاؤ کے بعد وفاقی وزارتِ صحت نے پاکستان میں بھی ہائی الرٹ جاری کرتے ہوئے باقاعدہ انتباہ اور ایڈوائزری جاری کر دی ہے۔ حکام کے مطابق ملک بھر کے ہوائی اڈوں، بندرگاہوں اور زمینی سرحدوں پر سخت اسکریننگ کی ہدایت کر دی گئی ہے۔

وزارت صحت کے مطابق پاکستان آنے والے اور ٹرانزٹ مسافروں کی 100 فیصد اسکریننگ لازمی قرار دی گئی ہے، جبکہ تمام مسافروں کی تھرمل اسکریننگ اور مکمل طبی معائنہ بھی کیا جائے گا۔ حکام نے مسافروں کی گزشتہ 21 دن کی مکمل سفری تاریخ کی تصدیق کے احکامات جاری کر دیے ہیں۔

نیپا وائرس سے متاثرہ یا ہائی رسک علاقوں سے آنے والے مسافروں کی خصوصی نگرانی کی جائے گی، جبکہ مشتبہ علامات ظاہر ہونے کی صورت میں مسافر کو فوری طور پر آئسولیٹ کرنے کی ہدایت دی گئی ہے۔

حکام کا کہنا ہے کہ کلیئرنس کے بغیر کسی مسافر کو پاکستان میں داخلے کی اجازت نہیں ہوگی۔ مزید بتایا گیا ہے کہ پاکستان میں تاحال نیپا وائرس کا کوئی تصدیق شدہ کیس رپورٹ نہیں ہوا، جبکہ بھارتی ریاست مغربی بنگال میں نیپا وائرس کے 5 کیسز سامنے آ چکے ہیں۔

نیپا وائرس کے پھیلاؤ کے خدشے کے پیش نظر تھائی لینڈ، ملائیشیا، ہانگ کانگ، سنگاپور اور نیپال میں بھی اسکریننگ کا عمل شروع کر دیا گیا ہے۔