ٹیکسٹائل صنعت ملکی معیشت کا ستون، اپٹما وفد کی وزرا سے ملاقات میں اہم فیصلے زیر بحث

اپٹما کے وفد نے وزیر خزانہ محمد اورنگزیب اور وزیر پیٹرولیم علی پرویز ملک سے ملاقات کی، جس میں ٹیکسٹائل سیکٹر کو درپیش مسائل، توانائی کی فراہمی اور برآمدی مسابقت پر تفصیلی گفتگو ہوئی۔

وزیر خزانہ محمد اورنگزیب نے کہا کہ ٹیکسٹائل صنعت ملکی برآمدات اور روزگار میں کلیدی کردار ادا کر رہی ہے۔ حکومت منصفانہ، مستحکم اور قابلِ پیش گوئی پالیسی فریم ورک فراہم کرنے کے عزم پر قائم ہے۔ ان کے مطابق برآمدی صنعت کے لیے کاروباری لاگت میں کمی کے لیے مختلف تجاویز پر غور کیا جا رہا ہے۔

انہوں نے کہا کہ توانائی کی قیمت اور مسلسل فراہمی ٹیکسٹائل سیکٹر کے لیے اولین ترجیح ہے، جبکہ توانائی کے شعبے میں اصلاحات صنعتی پیداوار کے تحفظ کے لیے نافذ کی جا رہی ہیں۔ فوری نوعیت کے صنعتی مسائل اور صنعتی علاقوں میں درپیش رکاوٹوں کے حل کے لیے متعلقہ اداروں سے رابطہ جاری ہے۔

اپٹما وفد نے مؤقف اختیار کیا کہ عالمی منڈی میں بڑھتی مسابقت کے باعث ٹیکسٹائل برآمد کنندگان دباؤ کا شکار ہیں اور توانائی، ٹیکس و ریگولیٹری اخراجات مسابقت کو متاثر کر رہے ہیں۔ وفد نے حکومت اور صنعت کے درمیان تعمیری مکالمے کو وقت کی اہم ضرورت قرار دیا۔

وزیر خزانہ نے اس بات کی یقین دہانی کرائی کہ برآمدی ترقی اور روزگار کے تحفظ کے لیے حکومتی تعاون جاری رہے گا۔