پاکستان اور ترکیہ کے درمیان چاول کی تجارت بڑھانے پر اتفاق

اسلام آباد میں وفاقی وزیر تجارت جام کمال خان اور ترکیہ کے سفیر کے درمیان اہم ملاقات ہوئی جس میں دونوں ممالک کے درمیان چاول کی تجارت میں اضافے پر اتفاق کیا گیا۔ ملاقات میں قیمتوں میں مسابقت، برآمدی حجم بڑھانے اور کسانوں کی آمدن کے تحفظ پر زور دیا گیا۔

وفاقی وزیر تجارت نے بتایا کہ وزیر اعظم کی ہدایت پر زرعی برآمدات کے فروغ کے لیے عملی اقدامات کیے جا رہے ہیں۔ انہوں نے کہا کہ پاکستان میں چاول کی بہترین فصل ہوئی ہے اور وافر برآمدی سرپلس دستیاب ہے، جسے عالمی قیمتوں کے مطابق ترکیہ کو فراہم کرنے کی پیشکش کی گئی ہے۔

جام کمال خان نے ترکیہ کو باسمتی اور دیگر اقسام کے چاول مسابقتی نرخوں پر سپلائی کی یقین دہانی کراتے ہوئے کہا کہ حکومت سے حکومت سطح پر چاول کی تجارت کے امکانات پر بھی غور کیا جا رہا ہے۔

ملاقات میں پاکستان ترکیہ ترجیحی تجارتی معاہدے (PTA) کے تحت چاول کے 18 ہزار میٹرک ٹن کوٹے میں اضافے اور باسمتی چاول پر صفر یا کم ٹیرف کے امکانات پر تبادلہ خیال کیا گیا۔

دونوں ممالک نے دوطرفہ تجارت کو پانچ ارب ڈالر تک بڑھانے کے ہدف کا اعادہ کیا اور کاروباری وفود کے تبادلے اور بزنس ٹو بزنس روابط کو فروغ دینے پر اتفاق کیا۔ آئندہ ہفتوں میں تکنیکی وفود کی ملاقات متوقع ہے۔