شرح سود برقرار: گورنرسٹیٹ بینک کا مانیٹری پالیسی کا اعلان

گورنر اسٹیٹ بینک آف پاکستان محمد جمیل احمد نے مانیٹری پالیسی کا اعلان کرتے ہوئے شرح سود کو آئندہ دو ماہ کے لیے برقرار رکھنے کا فیصلہ کیا ہے۔ کراچی میں پریس کانفرنس سے خطاب کرتے ہوئے انہوں نے کہا کہ ملکی معیشت میں بتدریج استحکام آ رہا ہے تاہم عالمی اور مقامی عوامل کے باعث محتاط پالیسی اپنائی گئی ہے۔

گورنر اسٹیٹ بینک کے مطابق رواں سال برآمدات میں 6 فیصد تک کمی کا امکان ہے جبکہ مہنگائی کی شرح 7.4 فیصد پر برقرار رہنے کی توقع ہے۔ ان کا کہنا تھا کہ سال 2026 میں افراطِ زر 5 سے 7 فیصد کے درمیان رہ سکتی ہے، اگرچہ بعض مہینوں میں یہ 7 فیصد سے تجاوز بھی کر سکتی ہے۔

محمد جمیل احمد نے بتایا کہ زرعی شعبے کی کارکردگی رواں سال بہتر رہے گی اور فصلوں کی بہتر پیداوار کے باعث زرعی نمو میں اضافہ متوقع ہے۔ انہوں نے کہا کہ بڑی صنعتوں کی ترقی گزشتہ آٹھ ماہ کے دوران بہتر ہو کر 10 فیصد سے تجاوز کر چکی ہے جبکہ ملکی جی ڈی پی گروتھ 3.75 سے 4.75 فیصد کے درمیان رہنے کا امکان ہے۔

گورنر اسٹیٹ بینک کا کہنا تھا کہ ملکی درآمدات میں اضافے سے کرنٹ اکاؤنٹ خسارہ صفر سے ایک فیصد کے درمیان رہ سکتا ہے۔ انہوں نے مزید بتایا کہ ترسیلات زر میں بہتری آئی ہے جبکہ درآمدات رواں سال 8 فیصد بڑھ سکتی ہیں۔