اے آئی کے زیادہ استعمال سے ذہنی صحت پر خطرناک اثرات سامنے آ گئے

اگر آپ روزمرہ زندگی میں آرٹی فیشل انٹیلی جنس (اے آئی) کا زیادہ استعمال کرتے ہیں تو یہ آپ کی ذہنی صحت کے لیے خطرہ بن سکتا ہے۔
جرنل JAMA Network Open میں شائع ہونے والی تحقیق کے مطابق، اے آئی ٹیکنالوجی کے استعمال اور ذہنی صحت کے درمیان براہِ راست تعلق پایا گیا ہے۔
امریکا کی 50 ریاستوں سے تعلق رکھنے والے 21 ہزار افراد پر کیے گئے سروے میں دریافت ہوا کہ اے آئی کے زیادہ استعمال سے ڈپریشن، انزائٹی اور چڑچڑے پن کی علامات سے متاثر ہونے کا امکان بڑھ جاتا ہے۔
تحقیق میں شامل افراد سے روزانہ، ہفتے یا مہینے کے حساب سے اے آئی چیٹ بوٹس کے استعمال کے بارے میں سوالات کیے گئے۔
محققین نے افراد کے ذاتی ڈیٹا جیسے آمدنی، تعلیمی قابلیت اور دیگر عوامل کو بھی مدنظر رکھا۔
نتائج کے مطابق زیادہ استعمال کرنے والوں میں ڈپریشن سے متاثر ہونے کا خطرہ تقریباً 30 فیصد زیادہ ہوتا ہے، اور اثرات مرد و خواتین دونوں پر یکساں ہیں۔
سب سے زیادہ خطرہ 25 سے 64 سال کی عمر کے افراد میں دیکھا گیا۔ تاہم، تحقیق میں یہ واضح نہیں کیا گیا کہ اے آئی کا زیادہ استعمال ذہنی صحت کو کس طرح متاثر کرتا ہے۔