ابوظبی: امریکا کی ثالثی میں روس یوکرین مذاکرات بے نتیجہ ختم 

امریکہ کی ثالثی میں ابوظبی میں ہونے والے دو روزہ روس یوکرین مذاکرات مکمل ہو گئے، تاہم کوئی اہم پیشرفت سامنے نہیں آئی۔ اماراتی حکومت کے ترجمان کے مطابق مذاکرات میں روسی اور یوکرینی حکام کے درمیان براہِ راست رابطہ ہوا اور بات چیت مثبت اور تعمیری ماحول میں ہوئی۔ امریکی مجوزہ امن فریم ورک کے نکات پر بھی توجہ مرکوز کی گئی۔

روسی وزارتِ خارجہ اور یوکرینی صدر زیلنسکی نے اگلے مذاکرات میں شرکت کی رضامندی ظاہر کی ہے۔ صدر زیلنسکی کا کہنا تھا کہ مذاکرات تعمیری رہے اور اگر مثبت پیش رفت ہوئی تو ایک ہفتے میں مزید اجلاس ہوں گے۔

امریکی عہدیداروں نے بھی سہ فریقی مذاکرات کو مفید قرار دیا اور کہا کہ فریقین روس یوکرین تنازع کے حل کے خواہاں ہیں۔ اگلے دور کی ملاقات اگلے ہفتے اتوار کو ابوظبی میں ہوگی، جس میں یوکرین امن معاہدے کو حتمی مرحلے کی طرف لے جایا جائے گا۔