پاکستان اور امریکا نے جعلی و فراڈ ویزا نیٹ ورکس کے خلاف مشترکہ کارروائی کا فیصلہ کر لیا

اسلام آباد: پاکستان اور امریکا نے جعلی اور فراڈ ویزا نیٹ ورکس کے خلاف جامع ایس او پیز کے تحت مشترکہ کارروائی کرنے کا فیصلہ کیا ہے۔ یہ فیصلہ وزیرِ داخلہ محسن نقوی اور امریکی ناظم الامور نیٹلی بیکر کے درمیان ملاقات کے دوران کیا گیا۔

ملاقات میں دونوں فریقین نے قانون نافذ کرنے والے اداروں خصوصاً پولیس کی تربیت اور ہر سطح پر اشتراک بڑھانے پر اتفاق کیا۔ اس کے علاوہ دوطرفہ تعلقات، باہمی مفادات کے شعبوں میں تعاون، غیر قانونی امیگریشن کی روک تھام، اور پری امیگریشن کلیرنس نظام کی افادیت پر بھی تبادلہ خیال کیا گیا۔

وزیرِ داخلہ محسن نقوی نے کہا کہ ایجنٹ مافیا کے خلاف زیرو ٹالرنس کی پالیسی اختیار کی گئی ہے اور اس ضمن میں امریکی تعاون کا خیرمقدم کیا جائے گا۔ انہوں نے کہا کہ وہ جعلی ویزا نیٹ ورکس کے خلاف کارروائی کی خود نگرانی کر رہے ہیں اور پاسپورٹ سسٹم کو جدید ٹیکنالوجی سے فول پروف بنایا گیا ہے۔

نیٹلی بیکر نے کہا کہ پاکستان کے ساتھ تعلقات کو خصوصی اہمیت دیتے ہیں اور ہماری ترجیحات ایک ہیں۔ دونوں ممالک کے درمیان باہمی تعاون تعلقات کو مزید مضبوط کرے گا۔