ٹرمپ کا بیان توہین آمیز قرار، برطانوی وزیراعظم نے معافی مانگنے کا مطالبہ کر دیا

برطانیہ کے وزیراعظم سر کیئر سٹارمر نے افغانستان میں برطانیہ اور نیٹو کے کردار سے متعلق امریکی صدر ڈونلڈ ٹرمپ کے بیان کو خطرناک اور توہین آمیز قرار دیتے ہوئے ان سے معافی مانگنے کا مطالبہ کر دیا ہے۔

ایک بیان میں سر کیئر سٹارمر نے کہا کہ اگر میں نے ایسا بیان دیا ہوتا تو یقینی طور پر معافی مانگتا۔ انہوں نے یاد دلایا کہ نائن الیون کے بعد افغانستان میں امریکا کا ساتھ دیتے ہوئے جنگ کے دوران 457 برطانوی فوجی ہلاک ہوئے تھے۔ ان کا کہنا تھا کہ صدر ٹرمپ کا یہ دعویٰ کہ نیٹو فوجی افغانستان میں جنگ کے دوران فرنٹ لائن سے دور رہے، حقیقت کے منافی ہے۔

برطانوی وزیراعظم نے صدر ٹرمپ کے بیان کو ’’مضحکہ خیز‘‘ قرار دیا۔ کنزرویٹو پارٹی کی رہنما کیمی بیڈینوک نے بھی اس بیان کو ’’فضول بکواس‘‘ قرار دیتے ہوئے شدید تنقید کی۔

دوسری جانب امریکا میں مقیم برطانوی شہزادہ ہیری نے بھی اس معاملے پر ردعمل دیتے ہوئے کہا کہ افغانستان میں خدمات سرانجام دینے والی نیٹو افواج کی قربانیوں کا احترام کیا جانا چاہیے۔

شہزادہ ہیری کا کہنا تھا کہ انہوں نے خود بھی افغانستان میں فوجی خدمات انجام دیں، وہاں دوست بنائے اور دوستوں کو کھویا، کئی ماں باپ نے اپنے بیٹوں اور بیٹیوں کو دفن کیا جبکہ بہت سے بچے والدین کے بغیر رہ گئے۔