وزیرِ خزانہ سے سعودی وزیر سرمایہ کاری کی ملاقات، اقتصادی تعاون بڑھانے پر اتفاق

وفاقی وزیر خزانہ محمد اورنگزیب نے سعودی عرب کے وزیر سرمایہ کاری خالد الفالح سے ملاقات کی، جس میں پاکستان اور سعودی عرب کے درمیان اقتصادی تعاون کو مزید فروغ دینے پر اتفاق کیا گیا۔

جاری اعلامیے کے مطابق ملاقات میں دوطرفہ سرمایہ کاری اور مختلف جاری منصوبوں کی پیشرفت کا تفصیلی جائزہ لیا گیا۔ سعودی قیادت کی جانب سے پاکستان میں سرمایہ کاری کے مواقع پر بھرپور اعتماد کا اظہار کیا گیا۔

اعلامیے میں بتایا گیا کہ دونوں ممالک نے ادارہ جاتی تعاون بڑھانے کے عزم کا اعادہ کیا اور اس بات پر اتفاق ہوا کہ تکنیکی ٹیموں کے قریبی رابطے کے ذریعے مشترکہ ترجیحات کو مؤثر انداز میں آگے بڑھایا جائے گا۔ پاکستان اور سعودی عرب کے درمیان اقتصادی شراکت داری کو نئی وسعت دینے پر بھی زور دیا گیا۔

مزید کہا گیا کہ ملاقات میں اعلیٰ سطحی روابط کو مستحکم کرنے اور باہمی اعتماد کو مزید مضبوط بنانے کا فیصلہ کیا گیا، جو مستقبل میں دونوں ممالک کے درمیان اقتصادی تعلقات کو نئی جہت دے گا۔