پاکستان کی معاشی حالت مستحکم نہیں، طویل مدتی ریٹنگ بی نیگٹو برقرار: فچ رپورٹ

بین الاقوامی کریڈٹ ریٹنگ ایجنسی فچ نے پاکستان کی معاشی صورتحال پر نئی رپورٹ جاری کر دی ہے، جس میں طویل مدتی کریڈٹ ریٹنگ بی نیگٹیو برقرار رکھتے ہوئے ریکوری ریٹنگ بھی متعین کی گئی ہے۔

رپورٹ میں بتایا گیا ہے کہ پاکستان میں سیاسی استحکام اور قانون کی حکمرانی کا اسکور کمزور ہے، جبکہ حکومتی قرضوں اور سود کی ادائیگیوں کی وجہ سے ڈیفالٹ کی صورت میں اوسط درجے کی ریکوری ممکن ہے، جس میں سرمایہ کاروں کو 31 سے 50 فیصد تک رقم واپس ملنے کا امکان ہے۔

فچ کے مطابق پاکستان کی آؤٹ لک مستحکم ہے، تاہم حکومتی قرضوں میں کمی نہ ہونا، آئی ایم ایف پروگرام میں تاخیر، اور بیرونی مالی دباؤ ریٹنگ پر اثر انداز ہو سکتے ہیں۔ رپورٹ میں عالمی بینک گورننس انڈیکس کے مطابق پاکستان کا گورننس اسکور صرف 22 فیصد بتایا گیا ہے۔

واضح رہے کہ فچ نے 15 اپریل 2025 کو پاکستان کی ریٹنگ کو ٹرپل سی پازیٹو سے بڑھا کر بی نیگٹو کیا تھا۔