گل پلازہ آتشزدگی: تاجروں نے نقصان کے ازالے اور ریسکیو میں تعاون کا مطالبہ کردیا

کراچی: گل پلازہ میں آگ لگنے کے واقعے کے بعد تاجر رہنما مزمل چیپل، محمد اسماعیل اور محمد صدق ایرانی نے میڈیا سے گفتگو میں کہا کہ تاجروں کے نقصان کا ازالہ ہونا چاہیے اور ریسکیو آپریشن میں فوری تعاون کی ضرورت ہے۔

مزمل چیپل نے کہا کہ جو افراد جا چکے ہیں ان کے لیے دعائیں کر رہے ہیں، شہید ہونے والوں کی تعداد چھ ہے اور اربوں روپے کا نقصان ہوا ہے۔ تقریباً 40 افراد ابھی بھی ملبے میں دبے ہوئے ہیں۔

صدر محمد اسماعیل نے کہا کہ عمارت بنانے میں بہت کام کیا گیا، اور اب دیکھنا ہے کہ متاثرین کی کس طرح مدد کی جائے۔ انہوں نے ریسکیو ٹیم کی کارکردگی پر تحفظات کا اظہار کیا اور بتایا کہ آگ لگنے کے ایک گھنٹے بعد پہلی گاڑی پہنچی۔

نائب صدر محمد صدق ایرانی نے کہا کہ دوسری ریسکیو گاڑی بھی دیر سے پہنچی اور حکومت نے کوئی مدد فراہم نہیں کی۔ گل پلازہ میں 510 اقسام کی دکانیں موجود ہیں اور ابھی تک زندہ افراد کی کوئی اطلاع نہیں ہے۔ تاجر رہنماوں نے دعا کی کہ اللہ تعالیٰ اندر موجود لوگوں کا حافظ ہو۔