پی ایس ایل 11 کی تاریخ فائنل، 26 مارچ سے کرکٹ میلہ سجنے کو تیار

لاہور: پاکستان سپر لیگ کے گیارہویں ایڈیشن کے آغاز کی تاریخ طے کر دی گئی ہے۔ پی ایس ایل گورننگ کونسل کے اجلاس میں فیصلہ ہوا کہ HBL PSL 11 کا آغاز 26 مارچ سے کیا جائے گا۔

گورننگ کونسل کا اجلاس چیئرمین پی سی بی محسن نقوی کی زیر صدارت ہوا، جس میں لیگ کے انتظامی اور تکنیکی معاملات پر تفصیلی غور کیا گیا۔

اجلاس میں سیالکوٹ اور حیدرآباد کی نئی ٹیموں کو خوش آمدید کہا گیا اور نئی ٹیموں کی نیلامی کو لیگ کی توسیع اور مقبولیت میں اضافے کی علامت قرار دیا گیا۔

شرکاء نے PSL 11 کے شیڈول، کھلاڑیوں کی ریٹینشن اور ٹیموں کی تیاریوں پر بھی بات چیت کی۔ پلیئر آکشن، ڈرافٹ اور ڈائریکٹ سائننگ کے طریقۂ کار پر مشاورت کی گئی، جس کا حتمی فیصلہ آئندہ ہفتے ہونے والے اجلاس میں متوقع ہے۔

اجلاس میں تمام آٹھ پی ایس ایل ٹیموں کے نمائندے اور پی ایس ایل انتظامیہ شریک ہوئی۔