تیسرے ٹی20 میں سری لنکا کی پاکستان کو 14 رنز سے شکست، سیریز 1-1 سے برابر

دمبولا : تیسرے اور آخری ٹی20 میچ میں سری لنکا نے پاکستان کو 14 رنز سے ہرا کر سیریز 1-1 سے برابر کردی۔

دمبولا میں کھیلا گیا فیصلہ کن میچ بارش کے باعث تاخیر سے شروع ہوا، جس کے بعد میچ کو 12 اوورز فی اننگز تک محدود کردیا گیا۔

پاکستان نے ٹاس جیت کر پہلے سری لنکا کو بیٹنگ کی دعوت دی۔ میزبان ٹیم نے مقررہ 12 اوورز میں 6 وکٹ پر 160 رنز بنائے اور پاکستان کو 161 رنز کا ہدف دیا۔

سری لنکا کی جانب سے دسن شناکا نے 34، کوشال مینڈس نے 30 جبکہ جنتھ لیانگے اور دننجایا ڈی سلوا نے 22،22 رنز بنائے۔ پاکستان کی طرف سے وسیم جونیئر نے 3 جبکہ محمد نواز، فہیم اشرف اور نسیم شاہ نے ایک ایک وکٹ حاصل کی۔

ہدف کے تعاقب میں پاکستانی ٹیم 12 اوورز میں 8 وکٹ پر 146 رنز ہی بنا سکی۔ سلمان علی آغا 45 رنز کے ساتھ نمایاں رہے۔ محمد نواز نے 28 اور ڈیبیو کرنے والے خواجہ نافع نے 26 رنز اسکور کیے۔

دیگر کھلاڑیوں میں صاحبزادہ فرحان 9، صائم ایوب 6، عثمان خان 1، شاداب خان 6 اور فہیم اشرف 9 رنز بنا سکے۔ سری لنکا کے ونندو ہسارنگا نے 4 جبکہ پراتھی رانا نے 2 اور ایشان ملنگا نے ایک وکٹ حاصل کی۔

سیریز کے پہلے میچ میں پاکستان نے سری لنکا کو 6 وکٹ سے شکست دی تھی جبکہ دوسرا میچ بارش کے باعث منسوخ ہوگیا تھا۔