بل گیٹس نے طلاق کے بعد میلِنڈا کی فلاحی تنظیم کو اربوں ڈالر منتقل کردیئے

مائیکروسافٹ کے بانی اور دنیا کے امیر ترین افراد میں شامل بل گیٹس نے اپنی سابق اہلیہ میلِنڈا فرنچ گیٹس کی نجی فلاحی تنظیم کو خاموشی سے اربوں ڈالر منتقل کر دیے ہیں۔

ٹیکس فائلنگ کے حالیہ انکشاف کے مطابق، بل گیٹس نے طلاق کے بعد 7.88 ارب ڈالر کی مالی ادائیگی میلِنڈا کی فلاحی تنظیم کو کی، جو اس سلسلے میں اب تک کی سب سے بڑی رقم سمجھی جا رہی ہے۔ یہ پہلی بار ہے کہ 2021 میں طلاق کے مالی معاملات منظرِ عام پر آئے ہیں۔

میلِنڈا گیٹس نے اس سے قبل بل اینڈ میلِنڈا گیٹس فاؤنڈیشن کی شریک چیئرپرسن کے عہدے سے استعفیٰ دیتے وقت کہا تھا کہ طلاق کے معاہدے کے تحت انہیں خواتین اور خاندانوں سے متعلق آزاد فلاحی کام کے لیے اربوں ڈالر فراہم کیے جائیں گے۔

رپورٹس کے مطابق، مجموعی اثاثوں کی تقسیم کے بعد میلِنڈا گیٹس کے اثاثے تقریباً 25 ارب ڈالر تک پہنچ چکے ہیں۔ طلاق کے فوراً بعد بل گیٹس نے اپنی نجی سرمایہ کاری کمپنی Cascade Investment کے ذریعے اربوں ڈالر مالیت کے شیئرز میلِنڈا کو منتقل کیے۔ اس کے علاوہ دونوں نے 170 ملین ڈالر سے زائد مالیت کی جائیداد، تقریباً 130 ملین ڈالر کے فن پارے اور مائیکروسافٹ کے اہم حصص کی تقسیم پر بھی اتفاق کیا۔

مئی 2021 میں دونوں نے طلاق کا اعلان کرتے ہوئے کہا تھا کہ وہ اب ایک ساتھ آگے بڑھنے کے قابل نہیں رہے، اور اگست 2021 میں یہ علیحدگی باضابطہ طور پر مکمل ہوئی۔