سعودی وزیر داخلہ کے معاون لیفٹیننٹ جنرل سعید القحطانی انتقال کر گئے

سعودی عرب کے وزیر داخلہ کے معاون برائے آپریشنل امور لیفٹیننٹ جنرل سعید بن عبداللہ القحطانی قضائے الٰہی سے انتقال کر گئے۔ عرب میڈیا کے مطابق ان کے انتقال کی تصدیق سعودی وزارت داخلہ نے سوشل میڈیا پلیٹ فارم ایکس پر جاری ایک باضابطہ بیان کے ذریعے کی۔

وزارت داخلہ کے بیان میں مرحوم کے اہلِ خانہ اور لواحقین سے تعزیت کا اظہار کیا گیا اور وزارت کے لیے ان کی خدمات کو سراہا گیا۔ سعودی وزیر داخلہ شہزادہ عبدالعزیز بن سعود بن نائف نے بھی لیفٹیننٹ جنرل سعید القحطانی کے انتقال پر افسوس کا اظہار کیا۔

وزیر داخلہ کے مطابق لیفٹیننٹ جنرل سعید القحطانی نے تقریباً چھ دہائیوں تک وزارت داخلہ میں خدمات انجام دیں اور مختلف انتظامی و آپریشنل ذمہ داریاں نبھائیں۔ انہوں نے کہا کہ مرحوم نے داخلی سلامتی اور سیکیورٹی امور میں پیشہ ورانہ انداز میں کردار ادا کیا۔

خیال رہے کہ لیفٹیننٹ جنرل سعید بن عبداللہ القحطانی کنگ فہد سیکیورٹی کالج کے فارغ التحصیل تھے اور وزارت داخلہ میں مختلف اہم اور حساس عہدوں پر تعینات رہے۔ وہ داخلی سلامتی، آپریشنز اور سیکیورٹی پالیسیوں سے متعلق امور میں خدمات انجام دینے کے باعث ایک منظم اور تجربہ کار افسر کے طور پر جانے جاتے تھے۔