وینزویلا میں 100 ارب ڈالر سرمایہ کاری کا پلان کررہے ہیں ، صدر ٹرمپ

امریکی صدر ڈونلڈ ٹرمپ نے کہا ہے کہ امریکا وینزویلا میں 100 ارب ڈالر تک سرمایہ کاری پر غور کر رہا ہے، جس کا مقصد وینزویلا کی تیل صنعت کو دوبارہ تعمیر کرنا ہے۔

وائٹ ہاؤس میں آئل ایگزیکٹوز سے ملاقات کے بعد میڈیا سے گفتگو کرتے ہوئے صدر ٹرمپ نے بتایا کہ وینزویلا کی تیل صنعت کی بحالی کے مختلف پہلوؤں پر بات چیت کی جا رہی ہے اور اس بات کا فیصلہ کیا جائے گا کہ کون سی تیل کمپنیاں وہاں جائیں گی۔ ان کا کہنا تھا کہ تیل کمپنیاں وینزویلا کے بجائے امریکا سے براہ راست معاہدے کریں گی۔

صدر ٹرمپ کے مطابق امریکا فوری طور پر وینزویلا کے 5 کروڑ بیرل تیل کی ریفائننگ اور فروخت شروع کرے گا۔ انہوں نے انکشاف کیا کہ ایک آئل ٹینکر کو اس وقت پکڑا گیا جب وہ امریکا کی منظوری کے بغیر وینزویلا سے روانہ ہوا تھا۔ ٹرمپ کا کہنا تھا کہ وینزویلا کی جانب سے گزشتہ روز 30 ملین بیرل تیل فراہم کیا گیا۔

دوسری جانب امریکا کی بڑی آئل کمپنیوں نے وینزویلا میں سرمایہ کاری کے حوالے سے تحفظات کا اظہار کیا ہے، تاہم صدر ٹرمپ نے یقین دہانی کرائی کہ سرمایہ کاری کو مکمل تحفظ فراہم کیا جائے گا اور سرمایہ کاروں کو آمدنی بھی حاصل ہوگی۔

صدر ٹرمپ نے ایک سوال کے جواب میں دعویٰ کیا کہ اگر وہ موجود نہ ہوتے تو پاک بھارت جنگ جاری رہتی، اور انہوں نے 8 طیارے مار گرائے جانے کے بیان کو بھی دہرایا۔ مزید برآں، انہوں نے یہ بھی کہا کہ ایران میں مظاہرین نے ان کے نام پر ایک سڑک کا نام رکھ دیا ہے۔