امریکا نے آئل ٹینکر عملے کے 2 روسی ارکان کو رہا کردیا

امریکا نے قبضے میں لیے گئے آئل ٹینکر کے عملے کے دو روسی ارکان کو رہا کر دیا ہے۔ خبر رساں اداروں کے مطابق روسی وزارت خارجہ نے اپنے شہریوں کی رہائی کی تصدیق کر دی ہے۔

روسی وزارت خارجہ کی ترجمان ماریا زاخارووا نے اس حوالے سے کہا کہ امریکا کے اس فیصلے کا خیرمقدم کرتے ہیں اور روسی عملے کی رہائی پر امریکی قیادت کا شکریہ ادا کرتے ہیں۔ ان کا کہنا تھا کہ روس اپنے شہریوں کی جلد اور محفوظ وطن واپسی کو یقینی بنانے کے لیے تمام متعلقہ معاملات پر فوری طور پر عملی اقدامات کر رہا ہے۔

واضح رہے کہ امریکا نے بحر اوقیانوس میں وینزویلا سے منسلک روسی پرچم بردار آئل ٹینکر Bella 1 کو ضبط کر لیا تھا، جس پر روس نے سخت ردعمل دیتے ہوئے امریکی اقدام کو بحری قزاقی قرار دیا تھا۔