امریکا میں چرچ کے باہر فائرنگ، جنازے میں شریک افراد نشانہ بن گئے، 2 ہلاک

امریکا کی ریاست یوٹاہ کے دارالحکومت سالٹ لیک سٹی میں مورمن چرچ کے باہر فائرنگ کے ایک افسوسناک واقعے میں دو افراد ہلاک جبکہ چھ زخمی ہو گئے، جن میں سے تین کی حالت تشویشناک بتائی جا رہی ہے۔

پولیس کے مطابق یہ واقعہ دی چرچ آف جیزس کرائسٹ آف لیٹر ڈے سینٹس کی ایک اجتماع گاہ کی پارکنگ میں اس وقت پیش آیا جب درجنوں افراد جنازے میں شرکت کے لیے موجود تھے۔ حملہ آور تاحال گرفتار نہیں ہو سکا جبکہ اس کی تلاش کے لیے بڑے پیمانے پر سرچ آپریشن جاری ہے، جس میں ایف بی آئی بھی معاونت فراہم کر رہی ہے۔

سالٹ لیک سٹی پولیس چیف برائن ریڈ نے بتایا کہ فائرنگ کا واقعہ اتفاقی نہیں تھا تاہم ابتدائی شواہد کے مطابق یہ حملہ کسی مخصوص مذہب کو نشانہ بنانے کے لیے نہیں کیا گیا۔ چرچ کے ترجمان گلین ملز کے مطابق فائرنگ سے قبل پارکنگ میں تلخ کلامی یا جھگڑا ہوا جس کے بعد اچانک گولیاں چلائی گئیں۔

واقعے کے بعد علاقے میں تقریباً 100 قانون نافذ کرنے والے اداروں کی گاڑیاں پہنچ گئیں جبکہ ہیلی کاپٹرز نے بھی فضائی نگرانی کی۔
سالٹ لیک سٹی کی میئر ایرن مینڈن ہال نے واقعے پر گہرے دکھ کا اظہار کرتے ہوئے کہا کہ عبادت گاہ کے باہر اور یادگاری تقریب کے دوران ایسا واقعہ انتہائی افسوسناک ہے۔ چرچ انتظامیہ نے تحقیقات میں مکمل تعاون کی یقین دہانی کرائی ہے۔