امریکا کا 66 عالمی اداروں و تنظیموں سے علیحدگی اور فنڈنگ روکنے کا اعلان

امریکی صدر ڈونلڈ ٹرمپ نے اعلان کیا ہے کہ امریکا درجنوں بین الاقوامی اور اقوام متحدہ کے اداروں سے علیحدگی اختیار کرے گا، جن میں عالمی موسمیاتی معاہدہ اور خواتین کے حقوق سے متعلق اقوام متحدہ کا ادارہ بھی شامل ہے۔ صدر ٹرمپ کے مطابق یہ ادارے امریکی قومی مفادات کے خلاف کام کر رہے ہیں۔

وائٹ ہاؤس کی جانب سے جاری ایگزیکٹو آرڈر کے مطابق امریکا 35 غیر اقوام متحدہ تنظیموں اور 31 اقوام متحدہ کے اداروں سے نکلنے کا ارادہ رکھتا ہے، جن میں اقوام متحدہ کا فریم ورک کنونشن آن کلائمیٹ چینج بھی شامل ہے، جو 2015 کے پیرس ماحولیاتی معاہدے کی بنیاد سمجھا جاتا ہے۔

فیصلے کے تحت امریکا اقوام متحدہ کے ادارہ برائے خواتین (یو این ویمن) اور اقوام متحدہ کے پاپولیشن فنڈ (یو این ایف پی اے) سے بھی علیحدگی اختیار کرے گا۔ میمو کے مطابق ان اداروں سے علیحدگی کا مطلب امریکی شرکت اور مالی تعاون کا خاتمہ ہوگا۔

وائٹ ہاؤس کا کہنا ہے کہ یہ اقدام تمام بین الاقوامی تنظیموں اور معاہدوں کے جامع جائزے کا حصہ ہے تاکہ یہ طے کیا جا سکے کہ امریکی شمولیت اور فنڈنگ قومی ترجیحات اور مفادات سے ہم آہنگ ہے یا نہیں۔