وینزویلا تیل پر امریکی کارروائی، روسی پرچم والا ٹینکر ضبط، ماسکو نے اقدام خلاف قانون قرار دے دیا

امریکا نے بحرِ اوقیانوس اور کیریبین میں وینزویلا سے منسلک دو تیل بردار جہاز ضبط کر لیے ہیں، جن میں ایک روسی پرچم والا آئل ٹینکر بھی شامل ہے۔ روس نے اس اقدام کو بحری قزاقی قرار دیتے ہوئے شدید اعتراض کیا ہے۔

امریکی حکام کے مطابق شمالی بحرِ اوقیانوس میں روسی پرچم والا ٹینکر، جو پہلے Bella 1 اور بعد ازاں Marine Era کے نام سے رجسٹر ہوا، جبکہ کیریبین میں بغیر پرچم کے جہاز MT Sofia کو امریکی پابندیوں کی خلاف ورزی پر تحویل میں لیا گیا۔ کارروائی کے دوران روسی بحری جہاز اور آبدوز بھی علاقے میں موجود تھے۔

امریکی وزیر دفاع پیٹ ہیگسیتھ کا کہنا ہے کہ پابندیوں کے شکار وینزویلا کا تیل دنیا کے کسی بھی حصے میں منتقل نہیں کیا جا سکتا۔ امریکی میڈیا کے مطابق Bella 1 پر 2024 میں بھی پابندیاں عائد تھیں اور یہ جہاز پہلے کوسٹ گارڈ کی گرفت سے بچ نکلا تھا، تاہم دو ہفتوں کے تعاقب کے بعد ضبط کر لیا گیا۔

دوسری جانب روسی وزارتِ خارجہ نے کہا ہے کہ ٹینکر بین الاقوامی پانیوں میں تھا اور امریکی اقدام میری ٹائم قوانین کی خلاف ورزی ہے۔ روس نے جہاز پر موجود عملے کی حفاظت اور فوری واپسی کا مطالبہ کیا ہے۔