وینزویلا میں امریکی تیل کمپنیاں 18 ماہ کے اندر کام شروع کردیں گی؛ ٹرمپ کا دعویٰ

عالمی خبر رساں ادارے کے مطابق یہ بیان ایسے وقت میں سامنے آیا ہے جب 3 جنوری کی شب امریکی فوج نے وینزویلا کے صدارتی محل میں کارروائی کرتے ہوئے صدر نکولس مادورو اور ان کی اہلیہ کو بیڈروم سے گرفتار کر کے نیویارک منتقل کیا۔

امریکی صدر ڈونلڈ ٹرمپ نے امریکی چینل این بی سی نیوز سے گفتگو کرتے ہوئے کہا کہ وینزویلا کے تیل کے شعبے کو بحال کرنے کے لیے بہت بڑی سرمایہ کاری درکار ہوگی، جو امریکی تیل کمپنیاں کریں گی۔

صدر ٹرمپ کے مطابق امریکی آئل کمپنیاں پہلے سرمایہ کاری کریں گی اور بعد ازاں یہ رقوم یا تو امریکی حکومت یا تیل کی آمدنی کے ذریعے انہیں واپس ادا کی جائیں گی۔

ادھر بی بی سی کے شراکت دار ادارے سی بی ایس نیوز نے دعویٰ کیا ہے کہ آئندہ چند دنوں میں امریکی حکومت اور بڑی تیل کمپنیوں کے نمائندوں کے درمیان اہم ملاقات متوقع ہے، جس میں وینزویلا کے توانائی شعبے سے متعلق امور پر غور کیا جائے گا۔

دوسری جانب توانائی کے ماہرین نے ٹرمپ کے دعوے پر سنجیدہ شکوک کا اظہار کیا ہے۔ ماہرین کے مطابق وینزویلا کی تیل پیداوار بحال کرنے کے لیے دسیوں ارب ڈالر درکار ہوں گے۔

توانائی ماہرین کا مزید کہنا ہے کہ وینزویلا میں تیل کی پیداوار کی مکمل بحالی میں کم از کم 10 سال لگ سکتے ہیں، جبکہ سیاسی استحکام کے بغیر غیر ملکی کمپنیاں وہاں سرمایہ کاری سے گریز کریں گی۔