انٹرنیشنل میری ٹائم آرگنائزیشن کی 34ویں اسمبلی اور کونسل انتخابات،پاکستانی وفد کی شرکت

وفاقی وزیر بحری امور جنید انوار چودھری وفد کے ہمراہ برطانیہ پہنچ گئے ہیں جہاں پاکستانی وفد انٹرنیشنل میری ٹائم آرگنائزیشن (IMO) کی 34ویں اسمبلی اور کونسل انتخابات میں حصہ لے گا۔
جنید انوار چودھری نے روانگی سے قبل بیان میں کہا کہ پاکستان بحری سرمایہ کاری اور تجارت کا علاقائی مرکز بننے کا خواہاں ہے۔ انہوں نے پورٹ انفراسٹرکچر کی مضبوطی، سمندری معیشت کی ترقی اور جدید میری ٹائم پالیسیوں کی اہمیت پر زور دیا۔
وزیر بحری امور کا کہنا تھا کہ آئی ایم او کونسل میں پاکستان کی ممبرشپ نہ صرف سمندری سیکیورٹی بلکہ عالمی بحری ماحولیات کے تحفظ کے لیے بھی انتہائی اہم ہے۔
آئی ایم او کونسل کے انتخابات 28 نومبر کو ہوں گے، جن میں پاکستان کٹیگری ”سی“ میں کونسل نشست کے لیے مقابلہ کر رہا ہے۔ وزیر کے مطابق پاکستان اپنے بحری مفادات کے تحفظ اور عالمی بحری پالیسی میں مؤثر کردار بڑھانے کا خواہاں ہے۔