معاشی استحکام کے لیے 2025 کامیاب سال رہا: بلال اظہر کیانی

وزیرِ مملکت بلال اظہر کیانی نے کہا ہے کہ معاشی استحکام کے لیے 2025 ایک کامیاب سال ثابت ہوا۔

وفاقی دارالحکومت میں میڈیا سے گفتگو کرتے ہوئے بلال اظہر کیانی کا کہنا تھا کہ 2025 پاکستان کی کامیابیوں کا سال رہا، مسلح افواج نے بھارتی جارحیت کا منہ توڑ جواب دیا۔ انہوں نے کہا کہ معرکۂ حق میں فتح کے ساتھ ساتھ سفارتی محاذ پر بھی نمایاں کامیابیاں حاصل ہوئیں۔

وزیرِ مملکت کے مطابق پاکستان کی کامیابیوں کو دنیا بھر میں تسلیم کیا جا رہا ہے، جبکہ سندھ طاس معاہدے کے حوالے سے بھی عالمی برادری پاکستانی مؤقف کی تائید کر رہی ہے۔ انہوں نے ایک بار پھر اس بات پر زور دیا کہ معاشی استحکام کے لیے 2025 ایک اہم اور کامیاب سال رہا۔

بلال اظہر کیانی نے الزام عائد کیا کہ پی ٹی آئی نے آئی ایم ایف کو خط لکھ کر ملک کے خلاف سازش کی، تاہم حکومتی اقدامات کے نتیجے میں پالیسی ریٹ اور مہنگائی میں نمایاں کمی دیکھنے میں آئی ہے۔

انہوں نے مزید کہا کہ پی آئی اے کی شفاف طریقے سے کامیاب نجکاری کی گئی ہے، نجی انتظامیہ کے تحت ادارے کی کارکردگی میں بہتری آئے گی، جبکہ پی آئی اے میں روزگار کے نئے مواقع بھی پیدا ہوں گے۔