شاعرِ مشرق علامہ محمد اقبالؒ کا 148واں یومِ ولادت آج منایا جا رہا ہے

یومِ اقبال: شاعرِ مشرق کے افکار آج بھی قوم کے لیے مشعلِ راہ
ڈاکٹر علامہ محمد اقبالؒ کی 148ویں سالگرہ ملک بھر میں عقیدت و احترام سے منائی جا رہی ہے
سیالکوٹ کے روحانی اور فکری افق سے طلوع ہونے والے مفکرِ پاکستان، شاعرِ مشرق ڈاکٹر علامہ محمد اقبالؒ 9 نومبر 1877ء کو پیدا ہوئے۔ ہر سال اس دن کو ملک بھر میں یومِ اقبال کے طور پر منایا جاتا ہے۔
علامہ اقبالؒ نے اپنی ابتدائی تعلیم سیالکوٹ میں حاصل کی، پھر لاہور کے گورنمنٹ کالج سے بی اے اور ایم اے کیا۔ اعلیٰ تعلیم کے لیے آپ انگلستان اور جرمنی گئے، جہاں سے فلسفے میں پی ایچ ڈی کی ڈگری حاصل کی۔ تدریس، وکالت، شاعری اور سیاست— اقبالؒ نے ہر میدان میں اپنی غیر معمولی صلاحیتوں کا لوہا منوایا۔
اقبالؒ کے 1930ء کے الہٰ آباد والے صدارتی خطبے میں پیش کردہ تصورِ پاکستان نے برصغیر کے مسلمانوں کو نیا حوصلہ دیا۔
آپ 21 اپریل 1938ء کو خالقِ حقیقی سے جا ملے مگر ان کی تعلیمات آج بھی زندہ ہیں۔
شاعرِ مشرق نے نوجوانوں میں خودی، عمل، اور ایمان کی روح پھونکی۔ ان کے افکار اور شاعری آج بھی ملتِ اسلامیہ کے لیے مشعلِ راہ ہیں۔