فیصل آباد جھنگ روڈ پر بس اور وین میں خوفناک تصادم سے14 افراد جاں بحق

فیصل آباد جھنگ روڈ پر کلی فقیر کے قریب بس اور مسافر وین کے درمیان خوفناک تصادم کے نتیجے میں 13 افراد جاں بحق جبکہ 10 افراد شدید زخمی ہو گئے۔

ریسکیو ذرائع کے مطابق مسافر وین مخالف سمت سے آنے والی بس سے ٹکرا گئی، حادثہ اس قدر شدید تھا کہ متعدد افراد موقع پر ہی دم توڑ گئے۔ اطلاع ملتے ہی ریسکیو 1122 کی ٹیمیں جائے حادثہ پر پہنچ گئیں اور زخمیوں کو ابتدائی طبی امداد کے بعد ڈی ایچ کیو ہسپتال منتقل کر دیا گیا۔

واقعے کی اطلاع پر ڈپٹی کمشنر علی اکبر بھنڈر اور ڈی پی او بلال افتخار کیانی بھی موقع پر پہنچے اور زخمیوں کو فوری اور بہترین طبی سہولیات فراہم کرنے کی ہدایات جاری کیں۔

عینی شاہدین کے مطابق حادثہ تیز رفتاری کے باعث پیش آیا۔ ضلعی انتظامیہ اور افسران نے واقعے میں قیمتی انسانی جانوں کے ضیاع پر گہرے دکھ اور افسوس کا اظہار کیا ہے۔