پاکستان اور امریکا کی افواج کے درمیان 13 ویں مشترکہ مشق انسپائرڈ گیمبٹ کا آغاز

راولپنڈی: پاک فوج کے شعبہ تعلقات عامہ (آئی ایس پی آر) کے مطابق پاکستان اور امریکا کی افواج کے درمیان 13ویں دو طرفہ مشترکہ مشق انسپائرڈ گیمبٹ 2026 کا باقاعدہ آغاز ہو گیا ہے۔

آئی ایس پی آر کے مطابق یہ مشترکہ مشق 9 جنوری 2026 کو نیشنل کاؤنٹر ٹیررازم سینٹر پبی میں شروع ہوئی، جو دو ہفتوں تک جاری رہے گی۔ مشق انسدادِ دہشت گردی کے شعبے میں منعقد کی جا رہی ہے، جس میں پاک فوج اور امریکی فوج کے پیشہ ور دستے شرکت کر رہے ہیں۔

اعلامیے کے مطابق مشق کی افتتاحی تقریب میں دونوں ممالک کے اعلیٰ عسکری اور حکومتی حکام نے شرکت کی۔ مشترکہ مشق کا بنیادی مقصد انسدادِ دہشت گردی کے تجربات کے تبادلے کے ذریعے باہمی ہم آہنگی اور پیشہ ورانہ صلاحیتوں میں اضافہ کرنا ہے۔

آئی ایس پی آر نے بتایا کہ مشق کے دوران شہری جنگ میں نشانہ بازی کی مہارتوں پر خصوصی توجہ دی جا رہی ہے، جبکہ آپریشنل نظریات اور بہترین عسکری طریقۂ کار کی سمجھ بوجھ کو فروغ دیا جا رہا ہے۔ ایسی مشترکہ مشقیں بدلتے ہوئے سکیورٹی چیلنجز سے نمٹنے میں اہم کردار ادا کرتی ہیں۔

اعلامیے میں کہا گیا ہے کہ انسپائرڈ گیمبٹ 2026 خطے میں امن و استحکام کے لیے پاکستان اور امریکا کے مشترکہ عزم کی عکاس ہے۔