عمرہ زائرین کے لیے بڑی خوشخبری ، سعودی عرب میں ’دلیل المصلی‘ ایپ متعارف

ریاض: (ویب ڈیسک) سعودی عرب میں ادارہ امورِ حرمین شریفین نے عمرہ زائرین کے لیے ایک نئی ڈیجیٹل رہنما ایپ ’دلیل المصلی‘ متعارف کرادی ہے، جو اردو سمیت متعدد زبانوں میں دستیاب ہے۔

سعودی خبر رساں ادارے کے مطابق یہ ایپ حرمین شریفین کے زائرین کو نمازوں کے اوقات، آئمہ و موذنین کا تعارف، قرآنِ کریم کا ڈیجیٹل نسخہ، خطباتِ جمعہ، مسنون اذکار اور دروسِ حرمین تک آسان رسائی فراہم کرتی ہے۔

رپورٹ کے مطابق ایپ میں رمضان کے دوران اعتکاف سے متعلق مکمل رہنمائی بھی شامل ہے، جب کہ ڈیجیٹل واچ کے ذریعے نمازوں کے درمیان وقت کی نشاندہی کی جاتی ہے۔

’دلیل المصلی‘ گائیڈ عربی، اردو، انگلش، ترکی، فرانسیسی، ملاوی اور انڈونیشی زبانوں میں فراہم کی گئی ہے، اور اس کے استعمال کو نہایت آسان بنایا گیا ہے۔ زائرین حرمین شریفین میں موجود کیو آر کوڈز اسکین کرکے یہ ایپ اپنے موبائل فون پر انسٹال کرسکتے ہیں اور ایک بہتر روحانی تجربے سے مستفید ہوسکتے ہیں۔

دوسری جانب وزارتِ حج و عمرہ کے مطابق رواں سال کے عمرہ سیزن کے آغاز سے اب تک 38 لاکھ سے زائد زائرین نے عمرے کی سعادت حاصل کی ہے، جو گزشتہ سال کے مقابلے میں 6 فیصد زیادہ ہے۔

اعداد و شمار کے مطابق 28 لاکھ زائرین بیرونِ ملک سے عمرہ ویزے پر سعودی عرب پہنچے، جن کا تعلق 135 ممالک سے تھا۔