امریکی اور چینی صدر کی ملاقات، چین پر ٹیرف 10 فیصد کم کرنے کا اعلان

امریکی صدر ڈونلڈ ٹرمپ نے چین پر عائد ٹیرف میں 10 فیصد کمی کا اعلان کیا ہے۔ غیر ملکی میڈیا کے مطابق یہ فیصلہ امریکی اور چینی صدور کے درمیان ملاقات کے بعد کیا گیا۔

ٹرمپ نے بتایا کہ چین پر ٹیرف 57 فیصد سے کم ہو کر 47 فیصد رہ گیا ہے، جو فوری طور پر نافذ العمل ہوگا۔ ان کا کہنا تھا کہ صدر شی جن پنگ سے ملاقات انتہائی مثبت رہی اور دونوں ممالک کے درمیان کئی اہم فیصلے طے پائے۔

ٹرمپ نے مزید کہا کہ چین کی جانب سے سویابین کی خریداری فوری طور پر شروع کی جائے گی جبکہ نایاب معدنیات کے حوالے سے رکاوٹیں ختم کر دی گئی ہیں۔

انہوں نے اعلان کیا کہ وہ آئندہ سال اپریل میں چین کا دورہ کریں گے، جس کے بعد صدر شی امریکا کا دورہ کریں گے۔
امریکی صدر کے مطابق دونوں رہنماؤں نے یوکرین کے معاملے پر مل کر کام کرنے پر اتفاق کیا، تاہم تائیوان کے مسئلے پر کوئی گفتگو نہیں ہوئی۔