کوئٹہ: مانگی ڈیم دہشتگرد واقعہ، 11 پولیس اہلکاروں کو بازیاب کروا لیا گیا

بلوچستان کے ضلع زیارت کے علاقے مانگی ڈیم میں پیش آنے والے دہشت گردی کے واقعے کے بعد فورسز نے بڑی کامیابی حاصل کرتے ہوئے مغوی 11 پولیس اہلکاروں کو بحفاظت بازیاب کروا لیا ہے۔

تفصیلات کے مطابق، اس افسوسناک واقعے میں فرائض کی انجام دہی کے دوران پولیس کے 9 جوان بہادری سے لڑتے ہوئے جامِ شہادت نوش کر گئے تھے، جن کی نمازِ جنازہ سرکاری اعزاز کے ساتھ ادا کر دی گئی ہے۔ تاہم، واقعے کے بعد سے مزید 15 پولیس اہلکار تاحال لاپتہ ہیں جن کی تلاش جاری ہے۔

سیکیورٹی ذرائع کا کہنا ہے کہ لاپتہ اہلکاروں کی بحفاظت بازیابی کے لیے فرنٹیر کانسٹیبلری (ایف سی) اور پولیس کا مشترکہ سرچ آپریشن بڑے پیمانے پر جاری ہے۔ اس کارروائی کے دوران اب تک ‘فتنہ الہندوستان’ اور ‘فتنہ الخوارج’ کے 15 مبینہ دہشت گرد ہلاک ہو چکے ہیں جبکہ متعدد کے زخمی ہونے کی بھی اطلاعات ہیں۔ سیکیورٹی فورسز نے پورے علاقے کا محاصرہ کر رکھا ہے تاکہ باقی ماندہ اہلکاروں کو جلد از جلد بازیاب کرایا جا سکے