روس، یوکرین اور امریکا کے سہ فریقی مذاکرات کیلئے ہر ممکن کوشش کرنا ہوگی: زیلنسکی

یوکرینی صدر ولادیمیر زیلنسکی نے کہا ہے کہ روس، یوکرین اور امریکا کے مابین جنگ کے خاتمے کے لیے سہ فریقی مذاکرات کا دوبارہ انعقاد وقت کی اہم ضرورت ہے اور اس سلسلے میں ہر ممکن کوشش کی جائے گی۔ امریکی صدر ڈونلڈ ٹرمپ کے بالترتیب خصوصی نمائندوں اسٹیو وِٹکوف اور جیرڈ کشنر سے کیف میں اہم ملاقات کے بعد گفتگو کرتے ہوئے زیلنسکی نے کہا کہ یوکرین کو سہ فریقی مذاکراتی عمل کے لیے ماسکو کے جواب کا انتظار ہے، جبکہ امید ہے کہ امریکی ٹیم جلد دوبارہ کیف کا دورہ کرے گی۔ انہوں نے بتایا کہ امریکی وفد سے ملاقات انتہائی بامعنی اور تعمیری رہی، جس میں سیکیورٹی اور اقتصادی ضمانتوں کے ساتھ ساتھ یوکرین کو ایئر ڈیفنس میزائلوں کی فراہمی اور آنے والی سردیوں کے لیے امریکی اور یورپی امدادی پیکیج پر تفصیلی بات چیت کی گئی۔

دوسری جانب امریکی نمائندے جیرڈ کشنر نے تصدیق کی کہ واشنگٹن ایک جامع اور پائیدار امن پیکیج کی تشکیل پر تیز رفتاری سے کام کر رہا ہے اور امید ظاہر کی کہ مذاکرات کو جلد از جلد تینوں ممالک کے سہ فریقی فارمیٹ پر واپس لایا جائے گا۔ امریکی نمائندے اسٹیو وِٹکوف نے واضح کیا کہ امریکا اس مسلح تنازع کا صرف اور صرف سفارتی و سیاسی حل چاہتا ہے کیونکہ عسکری اقدامات سے اس مسئلے کا دائمی حل ممکن نہیں ہے۔