مسلح تنازع: یمن میں غذائی بحران سنگین ہونے کا خدشہ، اقوام متحدہ نے خبردار کر دیا

یمن میں شدت اختیار کرتے ہوئے مسلح تنازع اور تشدد کے باعث ایک بار پھر تباہ کن غذائی بحران پیدا ہونے کا شدید خدشہ پیدا ہو گیا ہے، جس پر عالمی خوراک پروگرام (WFP) نے ہنگامی امدادی کارروائیوں کا دائرہ کار وسیع کرتے ہوئے انہیں تیز کر دیا ہے۔ غیر ملکی خبر رساں ایجنسی کی رپورٹ کے مطابق حوثی ملیشیا کی عسکری کارروائیوں اور جھڑپوں کے نتیجے میں اب تک 1 لاکھ 20 ہزار سے زائد یمنی شہری بے گھر ہو چکے ہیں۔ اقوامِ متحدہ کی رپورٹ کے مطابق اس تازہ تنازع میں اب تک 700 افراد ہلاک اور ہزاروں زخمی ہو چکے ہیں۔ ڈبلیو ایف پی کے قائم مقام سربراہ کارل اسکاؤ نے بتایا کہ ادارہ اب تک متاثرہ علاقوں میں تقریباً 60 ہزار افراد کو کھانا اور ضروری غذائی سامان فراہم کر چکا ہے اور مزید لاکھوں بے گھر افراد تک فوری راشن پہنچانے کی تیاری کر رہا ہے۔

عالمی خوراک پروگرام کی رپورٹ کے مطابق یمن کی کل آبادی کا نصف حصہ، یعنی 1 کروڑ 80 لاکھ سے زائد افراد، اس وقت شدید غذائی عدم تحفظ کا شکار ہیں جبکہ پانچ سال سے کم عمر کے تقریباً 22 لاکھ بچے شدید غذائی قلت (سخت سوکھے کی بیماری) کا سامنا کر رہے ہیں۔ ماہرین کے مطابق یمن اپنی غذائی ضرورت کا 90 فیصد حصہ بیرونِ ملک سے درآمد کرتا ہے، جس کی وجہ سے بحری بندرگاہوں اور ہوائی اڈوں کی ناکہ بندی یا کارروائیوں سے رکاوٹیں اس غذائی بحران کو ناگفتہ بہ حالات کی طرف دھکیل سکتی ہیں۔ WFP نے عالمی برادری پر زور دیا ہے کہ وہ یمن میں انسانی تباہی کو روکنے کے لیے امدادی فنڈز اور بحری راستوں کی کھلی رسائی کو یقینی بنائے۔