ٹرمپ نے امریکی فوج کو ایران پر تازہ حملوں کا حکم دے دیا، وال سٹریٹ جرنل

امریکی اخبار وال سٹریٹ جرنل نے دعویٰ کیا ہے کہ امریکی صدر ڈونلڈ ٹرمپ نے مسلح افواج کو ایران کے خلاف تازہ ملٹری آپریشنز اور حملوں کی ہدایات جاری کر دی ہیں۔ رپورٹ کے مطابق، یہ ممکنہ حملے رواں ہفتے کے آخر (ویک اینڈ) میں شروع ہو سکتے ہیں، جن میں ایران کے بجلی گھروں، تیل کی ریفائنریز اور دیگر اہم توانائی تنصیبات کو نشانہ بنائے جانے کا امکان ظاہر کیا جا رہا ہے۔

اخبار کی رپورٹ میں مزید بتایا گیا ہے کہ ان کارروائیوں کا بنیادی مقصد تہران حکومت پر عسکری و معاشی دباؤ بڑھا کر اسے دوبارہ مذاکرات کی میز پر لانا ہے۔ یہ حملے امریکا اور اسرائیل کی مشترکہ کارروائی کے تحت کیے جانے کی توقع ہے۔

دوسری جانب، امریکی وزارة دفاع (پینٹاگون) نے ایران پر کسی بھی ممکنہ حملے کی خبروں پر براہِ راست تبصرہ کرنے سے معذرت کر لی ہے۔ ترجمان پینٹاگون کے مطابق، صدر ٹرمپ کے حتمی فیصلے اور احکامات سے قبل ممکنہ اہداف پر بات نہیں کی جا سکتی، تاہم امریکی افواج صدر کی جانب سے ملنے والی کسی بھی ہدایت پر فوری ردعمل دینے کے لیے مکمل تیار ہیں۔