نیتن یاہو نے خطے میں اجتماعی قتل کا سلسلہ جاری رکھا ہوا ہے: ہسپانوی وزیراعظم

ہسپانوی وزیراعظم پیڈرو سانچیز نے اقوام متحدہ کی جنرل اسمبلی کے 81ویں اجلاس سے خطاب کرتے ہوئے غزہ میں اسرائیل کی جاری فوجی کارروائیوں اور خونریزی پر شدید تنقید کی ہے۔ انہوں نے واضح الفاظ میں کہا کہ اسرائیلی وزیراعظم بنیامین نیتن یاہو خطے میں فلسطینیوں کے خلاف اجتماعی قتل (Massacre) کا سلسلہ جاری رکھے ہوئے ہیں، جسے عالمی برادری مزید برداشت نہیں کر سکتی۔

ہسپانوی وزیراعظم نے انکشاف کیا کہ سپین غزہ کی سنگین صورتحال کے ردعمل میں پہلے ہی اسرائیل کے خلاف پابندیوں سمیت متعدد اقدامات اٹھا چکا ہے، اور حکومت اس تنازع پر مزید سخت اقدامات لانے پر بھی سنجیدگی سے غور کر رہی ہے۔ واضح رہے کہ پیڈرو سانچیز حالیہ مہینوں کے دوران غزہ جنگ پر اسرائیلی پالیسیوں کے سب سے نمایاں یورپی نقادوں میں شامل رہے ہیں، اور اس سے قبل سپین اسرائیل کو ہتھیاروں کی برآمدات محدود کرنے کے ساتھ ساتھ دو طرفہ فوجی تعاون کو بھی روک چکا ہے۔

جنرل اسمبلی سے خطاب سے قبل ہسپانوی وزیراعظم نے اقوام متحدہ کے سیکرٹری جنرل انتونیو گوتیرس سے بھی خصوصی ملاقات کی، جس میں مشرقِ وسطیٰ کی بگڑتی ہوئی صورتحال اور بین الاقوامی تعاون کو مضبوط بنانے پر تبادلہ خیال کیا گیا۔ یاد رہے کہ سیکرٹری جنرل انتونیو گوتیرس نے بھی اپنے خطاب میں غزہ کی انسانی صورتحال کو اپنے دورِ منصب کی بدترین مثال قرار دیتے ہوئے فوری جنگ بندی اور انسانی امداد کی فراہمی کا پرزور مطالبہ کیا ہے۔