اسحاق ڈار کی عباس عراقچی سے ملاقات، امن و استحکام کیلئے مذاکرات پر زور

اقوام متحدہ کی جنرل اسمبلی کے اجلاس کے موقع پر نیویارک میں پاکستان کے نائب وزیراعظم اور وزیر خارجہ اسحاق ڈار اور ایران کے وزیر خارجہ عباس عراقچی کے درمیان اہم ملاقات ہوئی ہے، جس میں دوطرفہ تعلقات اور خطے کے مجموعی امن و استحکام پر تفصیلی تبادلہ خیال کیا گیا۔

دفترِ خارجہ کی جانب سے جاری کردہ بیان کے مطابق ملاقات کے دوران دونوں ممالک کے وزرائے خارجہ نے باہمی دلچسپی کے امور، دوطرفہ تعاون اور خطے کی بدلتی ہوئی علاقائی و بین الاقوامی صورتحال پر گفتگو کی۔ نائب وزیراعظم اسحاق ڈار نے اس موقع پر اس بات پر زور دیا کہ موجودہ کشیدہ علاقائی ماحول میں امن اور استحکام کے فروغ کا واحد راستہ باہمی مذاکرات، موثر سفارت کاری اور مسلسل سفارتی رابطے ہیں۔ دونوں فریقین نے اس بات پر اتفاق کیا کہ خطے کے چیلنجز سے نمٹنے کے لیے تہران اور اسلام آباد کے درمیان قریبی رابطہ اور باہمی مشاورت کا سلسلہ جاری رکھا جائے گا۔