پاکستان سمیت دنیا بھر میں آج آبادی کا عالمی دن منایا جارہا ہے

پاکستان سمیت دنیا بھر میں آج آبادی کا عالمی دن منایا جا رہا ہے، جہاں تیزی سے بڑھتی ہوئی آبادی ملک کے لیے ایک بہت بڑا چیلنج بن چکی ہے اور اس کا دباؤ دستیاب وسائل کو نگلنے لگا ہے۔ ماہرین نے خبردار کیا ہے کہ اگر آبادی بڑھنے کی یہی شرح برقرار رہی تو آئندہ 24 سال میں پاکستان آبادی کے لحاظ سے دنیا کا پانچواں بڑا ملک بن جائے گا۔ منصوبہ بندی کمیشن کی رپورٹ کے مطابق پاکستان کی آبادی 24 کروڑ سے تجاوز کر چکی ہے جس میں 64 فیصد آبادی 30 سال سے کم عمر نوجوانوں پر مشتمل ہے، اور خدشہ ہے کہ 2050 تک یہ تعداد 39 کروڑ تک پہنچ جائے گی۔ ملک میں آبادی میں اضافے کی سالانہ شرح 2.55 فیصد ہے، جہاں ہر سال تقریباً 68 لاکھ بچوں کی پیدائش ہوتی ہے، جبکہ ہر سال 11 ہزار مائیں دوران زچگی اور 20 ہزار نومولود بچے ایک ماہ کے اندر انتقال کر جاتے ہیں۔ مزید برآں، 40 فیصد بچے غذائی قلت (Stunting) کا شکار ہیں اور 26 ملین (2 کروڑ 60 لاکھ) بچے اسکولوں سے باہر ہیں۔ آبادی میں ہر ایک فیصد اضافہ فی کس آمدن میں سالانہ 35 ہزار روپے کمی کا باعث بن رہا ہے، اور ماہرین کا کہنا ہے کہ نئے افراد کو روزگار فراہم کرنے کے لیے 6 سے 7 فیصد جی ڈی پی گروتھ کی ضرورت ہوگی۔ ماہرین نے زور دیا ہے کہ اگر فوری اور ٹھوس منصوبہ بندی نہ کی گئی تو صحت، تعلیم اور معیشت کی بحالی کے اہداف حاصل کرنا ناممکن ہو جائے گا۔