جدید آبپاشی اور سبسڈی اصلاحات سے پاکستان کی ترقی ممکن,عالمی بینک

عالمی بینک نے جنوبی ایشیا میں ترقی کے حوالے سے جاری رپورٹ میں پاکستان کے لیے ٹیکس اصلاحات، پانی کے مؤثر استعمال اور سبسڈی اصلاحات پر زور دیا۔

رپورٹ میں کہا گیا کہ پاکستان دنیا کے سب سے زیادہ پانی کی قلت والے ممالک میں شامل ہے، اور ناقص آبپاشی نظام و غیر مؤثر زرعی طریقے پانی ضائع کر رہے ہیں۔ پنجاب میں جدید آبپاشی منصوبوں سے 57 فیصد پانی بچا ہے اور فصلوں کی پیداوار میں 14 تا 31 فیصد اضافہ ہوا ہے۔

عالمی بینک نے تجویز دی کہ بجلی اور گیس سبسڈی بی آئی ایس پی کے ساتھ منسلک کی جائے تاکہ مالی نقصان، غلط تقسیم اور سرکلر ڈیٹ میں کمی ممکن ہو۔ ایندھن پر دی جانے والی سبسڈی کو سماجی تحفظ کے پروگراموں پر خرچ کیا جا سکتا ہے۔

رپورٹ میں بتایا گیا کہ سیلاب سے متاثرہ چھوٹے کاروباروں کے لیے کلائمٹ رسک فیسلٹی قائم کی جارہی ہے، اور بی آئی ایس پی کو ڈیجیٹل نظام کے ذریعے مؤثر بنایا گیا ہے، جس سے کورونا کے دوران ایک کروڑ 20 لاکھ خاندانوں کو امداد فراہم کی گئی۔

عالمی بینک نے اس رپورٹ کو “خطرات سے استحکام کی جانب سفر” قرار دیا ہے۔