مال بردار ٹرین کی بوگیاں ڈی ریل ہونے سے ٹریک تاحال بند، بحالی کا کام جاری

وہاب شاہ ریلوے اسٹیشن کے قریب مال بردار ٹرین کی متعدد بوگیاں ڈی ریل ہونے کے باعث اپ اور ڈاؤن دونوں ریلوے ٹریکس پر ٹرینوں کی آمد و رفت تاحال معطل ہے۔ حادثے کی شدت کے باعث اپ ریلوے ٹریک 1 کلومیٹر سے زائد حصے تک اکھڑ کر شدید متاثر ہوا ہے جبکہ ڈاؤن ٹریک کو بھی بڑا نقصان پہنچا ہے۔ ریلوے انتظامیہ نے حادثے کے فوراً بعد ریسکیو اور بحالی کا کام شروع کر دیا جو مسلسل جاری ہے۔ حکام کے مطابق بحالی کا عمل دو مرحلوں میں انجام دیا جا رہا ہے؛ پہلے مرحلے میں ڈی ریل ہونے والی بوگیوں کو پٹری سے ہٹایا جا رہا ہے، جس کے بعد متاثرہ ٹریک کی مرمت کا کام شروع کیا جائے گا۔ ریلوے انتظامیہ کا کہنا ہے کہ تمام دستیاب وسائل کو بروئے کار لاتے ہوئے کوشش کی جا رہی ہے کہ ڈاؤن ٹریک کو آج شام تک مکمل کر کے ریلوے ٹریفک کو جزوی طور پر بحال کر دیا جائے۔