یوکرین مذاکرات کی بحالی کا فیصلہ روسی مفادات کو سامنے رکھ کر کریں گے، صدر پوتن

روسی صدر ولادیمیر پوتن نے سینٹ پیٹرزبرگ میں صحافیوں سے گفتگو کرتے ہوئے کہا ہے کہ یوکرین کے ساتھ تعطل کا شکار مذاکرات کی دوبارہ بحالی کی تجاویز میز پر موجود ہیں، تاہم اس حوالے سے تمام تر حتمی فیصلے روسی فیڈریشن کے قومی و سٹریٹجک مفادات کو مدِنظر رکھ کر کیے جائیں گے۔ انہوں نے انکشاف کیا کہ یوکرینی حکام کی جانب سے توانائی کی تنصیبات، ڈرون حملوں اور فضائی حدود میں جنگ بندی کی تجاویز سامنے آ رہی ہیں، کیونکہ یوکرین کو جدید روسی ‘گیران’ ڈرونز کے خلاف سخت دفاعی چیلنجز کا سامنا ہے۔ صدر پوتن نے واضح کیا کہ یوکرین نے ماضی میں استنبول مذاکراتی عمل کو خود منقطع کیا اور انتخابات کے دوران روس پر بڑے پیمانے پر ڈرون حملے کیے، لہٰذا اب کیف کو روسی جوابی کارروائیوں کا نتیجہ بھگتنا ہو گا۔

یورپی ممالک کے ساتھ کشیدگی پر بات کرتے ہوئے صدر پوتن نے روس کے یورپ پر حملے کے خدشات کو مکمل بے بنیاد اور سیاسی اشتعال انگیزی قرار دیا۔ ایسٹونیا کے وزیر دفاع کے بیان کو “سیاسی مسخرہ پن” قرار دیتے ہوئے ان کا کہنا تھا کہ یورپ اپنے شہریوں سے یوکرین جنگ کے اخراجات وصول کرنے کے لیے روسی خطرے کا فرضی ہوا کھڑا کر رہا ہے۔ امریکہ اور چین کے باہمی تعلقات کے حوالے سے روسی صدر نے صدر ڈونلڈ ٹرمپ اور صدر شی جن پنگ کے درمیان متوقع مذاکرات کا خیرمقدم کیا اور کہا کہ دنیا کی دو بڑی معیشتوں کے درمیان کسی بھی مثبت معاہدے کا اثر عالمی و روسی معیشت پر مثبت پڑے گا۔