وینزویلا میں قیامت خیز زلزلے سے ہلاکتوں کی تعداد 235 ہوگئی، 4 ہزار سے زائد افراد زخمی

کاراکاس: وینزویلا میں آنے والے 7.1 اور 7.5 شدت کے انتہائی شدید اور قیامت خیز زلزلوں کے بعد ہلاکتوں کی تعداد بڑھ کر 235 ہو گئی ہے، جبکہ 4 ہزار 300 سے زائد افراد زخمی ہیں جن میں سے درجنوں کی حالت تشویشناک بتائی جاتی ہے۔ زلزلوں کے نتیجے میں ایک 22 منزلہ ٹاور سمیت متعدد رہائشی و کمرشل عمارتیں زمین بوس ہو گئیں، جس کے بعد قائم مقام صدر ڈیلسی رودریگینز نے متاثرہ علاقوں کا ہنگامی دورہ کر کے ملک بھر میں اسٹیٹ آف ایمرجنسی (سخت ترین ہنگامی حالت) نافذ کرنے کا اعلان کر دیا ہے۔ شدید تباہی کے باعث اسکول، ٹرین سروس اور ملک کا مرکزی بین الاقوامی ایئرپورٹ مکمل طور پر بند کر دیا گیا ہے، جبکہ ملبے تلے دبے زندہ افراد کو نکالنے کے لیے امدادی ٹیمیں اور رضاکار دن رات کوشاں ہیں۔

اس بڑی قدرتی آفت پر عالمی برادری نے وینزویلا کے ساتھ گہرے دکھ کا اظہار کیا ہے۔ امریکی حکومت نے متاثرین کی فوری بحالی اور انسانی ہمدردی کی بنیاد پر 150 ملین ڈالر کی امداد کا اعلان کیا ہے اور صورتحال کا جائزہ لینے کے لیے مختلف عالمی ادارے متحرک ہو چکے ہیں۔ دوسری جانب، صدرِ پاکستان آصف علی زرداری اور وزیرِ اعظم محمد شہباز شریف نے بھی وینزویلا میں ہونے والے اس بڑے جانی و مالی نقصان پر شدید رنج و غم کا اظہار کرتے ہوئے وہاں کی حکومت، عوام اور سوگوار خاندانوں سے دلی ہمدردی کا اظہار کیا ہے۔