وینزویلا زلزلہ: ہلاکتیں 2,595 تک پہنچ گئیں، 38 ہزار افراد تاحال لاپتا

وینزویلا میں 24 جون کو آنے والے تباہ کن زلزلوں کے نتیجے میں جانی و مالی نقصان کا سلسلہ مزید بڑھ گیا ہے۔ ملک کی عبوری صدر ڈیلسی روڈریگز نے تصدیق کی ہے کہ زلزلے کے باعث ہلاکتوں کی مجموعی تعداد بڑھ کر 2,595 ہو گئی ہے، جبکہ زخمیوں کی تعداد 12 ہزار 400 سے تجاوز کر چکی ہے۔

عبوری صدر نے بتایا کہ زلزلہ زدہ علاقوں میں سرچ اینڈ ریسکیو آپریشن تاحال سرگرمی سے جاری ہے اور حکومت نے امدادی کام ختم نہیں کیے۔ انہوں نے بتایا کہ سب سے زیادہ متاثرہ ریاست ‘لاگویرا’ ہے، جہاں سرکاری عمارتیں گرنے کی وجہ سے متعدد علاقائی سرکاری حکام بھی جان کی بازی ہار گئے ہیں۔ ابتدائی رپورٹس کے مطابق ملک بھر میں اب تک 189 بڑی عمارتیں مکمل طور پر زمین بوس ہو چکی ہیں۔ اگرچہ حکام کی جانب سے لاپتا افراد کی کوئی سرکاری تعداد جاری نہیں کی گئی، تاہم غیر سرکاری آن لائن فہرستوں میں قریباً 38 ہزار 500 افراد اب بھی لاپتا بتائے جا رہے ہیں۔

ڈیلسی روڈریگز نے معاشی و بحالی کے اقدامات کے حوالے سے بتایا کہ متاثرہ علاقوں کی تعمیرِ نو کے لیے بین الاقوامی مالیاتی فنڈ (آئی ایم ایف) کے تعاون سے 20 کروڑ ڈالر کا ایک خصوصی فنڈ قائم کیا جا رہا ہے۔ آئی ایم ایف اور عالمی بینک نے وینزویلا کو مالی امداد اور آسان شرائط پر قرض کی پیشکش بھی کی ہے۔ اس فنڈ سے حاصل ہونے والی رقم سے متاثرہ شہریوں کے گھروں، بنیادی ڈھانچے (انفراسٹرکچر) اور دیگر متاثرہ تنصیبات کی ہنگامی بنیادوں پر بحالی کا کام شروع کیا جائے گا۔