سالک حسین کی گفتگو سے لگ رہا وہ اپنے حواس کھو بیٹھے ہیں: عظمیٰ بخاری

وزیر اطلاعات پنجاب عظمیٰ بخاری نے وفاقی وزیر چودھری سالک حسین کے بیان پر سخت ردِعمل دیتے ہوئے کہا ہے کہ سالک حسین کی گفتگو سے لگ رہا ہے کہ وہ اپنے حواس کھو بیٹھے ہیں، چودھریوں کے خاندان کو پہلے امتحان میں مونس الہٰی نے ڈالا اور اب دوسرے امتحان میں سالک حسین نے ڈال دیا ہے۔

اپنے ایک تند و تیز بیان میں صوبائی وزیر اطلاعات کا کہنا تھا کہ چودھری خاندان کی روایتی وضع دار اور رکھ رکھاؤ والی سیاست کو ان دو نالائق بچوں نے ناقابلِ تلافی نقصان پہنچایا ہے، جبکہ جس شریف خاندان نے انہیں سیاسی مقام اور پہچان دی، انہیں دھوکہ دینا ان کی پرانی تاریخ بن چکی ہے۔ عظمیٰ بخاری نے تنقید کرتے ہوئے کہا کہ موصوف اب چودھری کم اور تھڑے باز گفتگو زیادہ کر رہے ہیں، اور جو شخص خواتین کی تضحیک کرے وہ کسی صورت وضع دار نہیں کہلا سکتا۔

صوبائی وزیر نے چیلنج کرتے ہوئے کہا کہ چودھری برادران ایک ہفتے سے وزیراعلیٰ پنجاب مریم نواز کے نوٹس کا جواب نہیں دے سکے، اگر وہ جواب دینے کی پوزیشن میں نہیں ہیں تو وزارتوں سے فوری استعفے دے کر گھر چلے جائیں۔ انہوں نے مزید کہا کہ یہ دوغلی سیاست نہیں چل سکتی کہ ایک طرف کرپشن کا راگ الاپا جائے اور دوسری طرف ترقیاتی فنڈز بھی مانگے جائیں۔ عظمیٰ بخاری کا کہنا تھا کہ مریم نواز نے گجرات کو وہ حق اور ترقی دی ہے جو گزشتہ 50 سالوں میں چودھری ظہور الہٰی، شجاعت حسین اور پرویز الہٰی بھی نہیں دے سکے، لہٰذا ٹی وی پر بھاشن دینے کے بجائے استعفے دے کر اپوزیشن میں بیٹھیں تو آٹے دال کا بھاؤ معلوم ہو جائے گا۔