پنجاب حکومت نے چودھری موسیٰ الہٰی کی بھی سکیورٹی واپس لے لی

پنجاب میں سیاسی کشیدگی کے دوران وفاقی وزیر چودھری سالک حسین کے بعد گجرات سے ان کے کزن اور ممبر پنجاب اسمبلی (ایم پی اے) چودھری موسیٰ الہیٰ سے بھی پولیس سیکیورٹی واپس لے لی گئی ہے۔

مسلم لیگ (ق) کے سینئر رہنما چودھری موسیٰ الہیٰ، چودھری وجاہت حسین کے صاحبزادے، چودھری شجاعت حسین کے بھتیجے اور پی پی 32 گجرات سے ایم پی اے ہیں۔ اس پیشرفت پر ردِعمل دیتے ہوئے چودھری مونس الہیٰ نے کہا کہ سیکیورٹی واپس لی جائے یا جو چاہے کر لیا جائے، نئے صوبوں کے قیام کے مطالبے سے کسی صورت پیچھے نہیں ہٹا جائے گا اور نئے صوبے ہر حال میں بنیں گے۔

اس سے قبل پنجاب پولیس نے وفاقی وزیر برائے اوورسیز پاکستانیز چودھری سالک حسین سمیت متعدد وفاقی وزراء سے ایلیٹ فورس کا مستقل پروٹوکول واپس لیتے ہوئے اہلکاروں کو واپس رپورٹ کرنے کے احکامات جاری کیے تھے۔ ترجمان سالک ہاؤس کے مطابق چودھری سالک حسین کی گجرات میں واقع رہائش گاہ سے بھی پولیس سیکیورٹی مکمل طور پر ہٹا دی گئی ہے، جبکہ پنجاب آمد پر وفاقی وزراء کو صرف عارضی پروٹوکول فراہم کیا جائے گا۔