شہری ترقی کیلئے نئے تقاضوں کے مطابق انتظامی نظام ناگزیر ہے: راشد لنگڑیال

چیئرمین فیڈرل بورڈ آف ریونیو (ایف بی آر) راشد محمود لنگڑیال نے کہا ہے کہ پاکستان میں شہروں کی متوازن اور بہتر ترقی کے لیے نئے شہری حقائق کے مطابق جدید انتظامی نظام تشکیل دینا وقت کی اہم ضرورت بن چکا ہے۔

سماجی رابطے کی ویب سائٹ ایکس (ٹویٹر) پر اپنے ایک اہم بیان میں چیئرمین ایف بی آر کا کہنا تھا کہ پاکستان میں گزشتہ 14 برسوں (2012 سے 2026) کے دوران شہری رقبے میں تقریباً 25 فیصد جبکہ شہری آبادی میں 60 فیصد کا ریکارڈ اضافہ دیکھنے میں آیا ہے۔ انہوں نے اعداد و شمار شیئر کرتے ہوئے بتایا کہ فیصل آباد، ملتان اور سیالکوٹ کے شہری رقبے میں دوگنا اضافہ ہوا، اسلام آباد اور راولپنڈی کا شہری پھیلاؤ 1.8 گنا بڑھا، لاہور میں ڈیڑھ گنا، کراچی میں 40 فیصد اور پشاور میں 20 فیصد اضافہ ریکارڈ کیا گیا۔

راشد لنگڑیال نے شہری علاقوں کے آپس میں مدغم ہونے کی نشاندہی کرتے ہوئے کہا کہ لاہور، گوجرانوالہ اور قصور کی آبادیاں ایک دوسرے سے مل چکی ہیں، جبکہ شیخوپورہ، مریدکے اور کامونکی بھی لاہور کے وسیع انتظامی پھیلاؤ کا حصہ بن چکے ہیں۔ انہوں نے افسوس کا اظہار کیا کہ جی ٹی روڈ کے ساتھ ایک بڑا میٹروپولیٹن خطہ تشکیل پا رہا ہے، مگر لاہور کا پھیلاؤ چار اضلاع تک بڑھنے کے باوجود کوئی ایک جامع یا متحدہ انتظامی ادارہ موجود نہیں۔ اسی طرح کراچی کا انتظام بھی درجن بھر مختلف اراضی مالکانہ اداروں کے درمیان بٹا ہوا ہے، جبکہ پنجاب کے شہروں کا انتظام لگ بھگ ایک دہائی سے بیوروکریٹک ایڈمنسٹریٹرز کے سپرد ہے۔ انہوں نے زور دیا کہ ملک میں شہروں کی روشنیاں تو آپس میں مل گئی ہیں لیکن ریاستی انتظامی نظام اب بھی پرانے نقشے پر قائم ہے۔