امریکا میں برفانی طوفان کا زور برقرار، مختلف حادثات میں اموات 38 تک پہنچ گئیں

امریکا میں شدید برفانی طوفان کا سلسلہ تھم نہ سکا، مختلف حادثات کے نتیجے میں ہلاکتوں کی تعداد 38 ہو گئی ہے۔

واشنگٹن، نیویارک سمیت درجنوں ریاستوں میں یخ بستہ ہواؤں کے ساتھ بارش اور برف باری وقفے وقفے سے جاری ہے۔ امریکی میڈیا کے مطابق شدید برفباری کے باعث پیش آنے والے مختلف حادثات میں 38 افراد جان کی بازی ہار چکے ہیں، جن میں سے 10 اموات صرف نیویارک میں رپورٹ ہوئیں۔

واشنگٹن ڈی سی اور دیگر متاثرہ علاقوں میں ہر شے برف سے ڈھک گئی ہے، جبکہ وفاقی دفاتر دوسرے روز بھی بند رہے۔ دو روز کے دوران 16 ہزار سے زائد پروازیں منسوخ کر دی گئیں، جبکہ ساڑھے پانچ لاکھ سے زائد صارفین بجلی سے محروم ہیں۔

شمالی ریاستوں میں درجہ حرارت ریکارڈ حد تک گر گیا ہے۔ امریکی میڈیا کے مطابق یکم فروری تک درجہ حرارت نقطہ انجماد سے نیچے رہنے کا امکان ہے۔

ادھر کینیڈا میں بھی شدید برف باری جاری ہے، ٹورنٹو اور اونٹاریو کے جنوبی علاقے برف سے ڈھک گئے ہیں۔ خراب موسم کے باعث اسکول بند کر دیے گئے جبکہ ہزاروں پروازیں منسوخ ہوئیں۔ حکام نے شہریوں کو گھروں میں رہنے کی ہدایت کی ہے۔