ایران پر امریکی حملے کی دھمکیاں ناقابلِ قبول، روس کا سخت ردِعمل

روس نے ایران کے خلاف امریکی حملے کی دھمکیوں کو سختی سے مسترد کرتے ہوئے کہا ہے کہ ایسے بیانات قطعی طور پر ناقابلِ قبول ہیں۔

ماسکو میں روسی وزارتِ خارجہ کی جانب سے جاری بیان میں کہا گیا ہے کہ امریکا ایران میں ممکنہ بےامنی کو جواز بنا کر کسی بھی قسم کی فوجی کارروائی سے باز رہے، کیونکہ اس طرح کا اقدام مشرقِ وسطیٰ میں تباہ کن نتائج پیدا کر سکتا ہے۔

روسی وزارتِ خارجہ کے مطابق ایران پر کسی بھی ممکنہ حملے کے اثرات صرف خطے تک محدود نہیں رہیں گے بلکہ یہ عالمی سلامتی کے لیے بھی سنگین خطرہ بن سکتے ہیں۔

ترجمان نے مزید کہا کہ ایران کے غیر ملکی شراکت داروں کو تجارتی محصولات بڑھا کر بلیک میل کرنے کی کوششوں کو روس مسترد کرتا ہے اور ایسے ہتھکنڈوں کو عالمی قوانین کے منافی قرار دیتا ہے۔

بیان میں کہا گیا ہے کہ ایران میں مصنوعی طور پر بھڑکائے گئے احتجاج اب بتدریج ماند پڑ رہے ہیں اور روس کو امید ہے کہ ایران میں حالات آہستہ آہستہ استحکام کی جانب بڑھیں گے۔