آبنائے ہرمز کا مشن: ایران کا امریکا کا ساتھ دینے پر جنوبی کوریا کے مفادات کو نشانہ بنانے کا خدشہ

معروف ایرانی تجزیہ کار اور تہران یونیورسٹی کے پروفیسر محمد مرندی نے متنبہ کیا ہے کہ اگر جنوبی کوریا آبنائے ہرمز کے عسکری مشن میں امریکا کے ساتھ شامل ہوا تو ایران خطے میں اس کے تمام اقتصادی اور فوجی مفادات کو نشانہ بنا سکتا ہے۔ قطری نشریاتی ادارے سے گفتگو کرتے ہوئے پروفیسر محمد مرندی کا کہنا تھا کہ اگر جنوبی کوریا ایران کے خلاف امریکا کی قیادت میں جاری اس مہم کا حصہ بنتا ہے تو تہران اسے باضابطہ طور پر دشمن ملک تصور کرے گا اور خلیج فارس سمیت مختلف علاقوں میں اس کے مفادات کو ایرانی جوابی کارروائی کا سامنا کرنا پڑے گا۔

انہوں نے کہا کہ آبنائے ہرمز میں امریکی اتحاد کے ساتھ جنوبی کوریا کی شرکت اس کے اپنے مفادات کے لیے انتہائی خطرناک ثابت ہوگی۔ پروفیسر مرندی نے مزید کہا کہ اس اتحاد میں جنوبی کوریا کی ممکنہ شمولیت سے جنگ کے مجموعی نتائج یا طاقت کے توازن پر کوئی بڑا اور فیصلہ کن اثر نہیں پڑے گا، کیونکہ ایک یا دو اضافی بحری جہاز بھیج کر امریکا کی مدد کرنا ایک بے وقوفانہ اقدام کے سوا کچھ نہیں ہے۔