ایران کا آئندہ چند روز میں آبنائے ہرمز سے باہر نیا محدود زون قائم کرنے کا اعلان

مشرقِ وسطیٰ میں جاری شدید سفارتی و عسکری کشیدگی میں مزید اضافہ ہو گیا ہے اور ایران نے آئندہ چند دنوں میں آبنائے ہرمز سے باہر ایک نیا ‘محدود زون’ (Restricted Zone) قائم کرنے کا باضابطہ اعلان کر دیا ہے۔ ایران کی سپریم نیشنل سیکیورٹی کونسل کے سیکرٹری محسن رضائی نے بتایا کہ یہ نیا محدود زون امریکی بحریہ کی ناکہ بندی لائن سے خلیج فارس کے اہم حصوں تک پھیلا ہوا ہوگا، اور اس زون میں داخل ہونے والے تمام بحری جہازوں کو ایرانی پابندیوں کی فہرست میں شامل کیا جائے گا۔ انہوں نے واضح کیا کہ آبنائے ہرمز اس وقت مکمل طور پر بند اور ایرانی مسلح افواج کے کنٹرول میں ہے، جبکہ امریکی صدر ڈونلڈ ٹرمپ کا اس راہداری کے کھلے ہونے کا دعویٰ مکمل طور پر غلط ہے۔

محسن رضائی کا کہنا تھا کہ آبنائے ہرمز کی بندش سے قبل یہاں سے روزانہ 100 سے زائد تجارتی جہاز گزرتے تھے جو اب گھٹ کر صرف 7 سے 8 پر آ چکے ہیں۔ انہوں نے کہا کہ امریکا بھاری اخراجات اٹھا کر محض 5 سے 6 بحری جہازوں کو نکلوانے میں کامیاب ہو رہا ہے، تاہم ایران نے ابھی تک تیل بردار جہازوں کو ڈبونے کی پالیسی نہیں اپنائی۔ انہوں نے مزید انکشاف کیا کہ ایران نے ایک نئے اور جدید اینٹی شپ میزائل کا کامیاب تجربہ کیا ہے، جس سے 48 گھنٹے قبل امریکی بحریہ کے ایک جنگی جہاز کو نشانہ بنایا گیا جس کے بعد وہ جہاز علاقے سے فرار ہو گیا۔