صدر مملکت کا دورہ فرانس منسوخ، 8 ستمبر کو پاکستان واپسی ہوگی

صدرِ مملکت آصف علی زرداری نے فرانس کا اپنا طے شدہ دو روزہ دورہ منسوخ کر دیا ہے اور وہ اب برطانیہ کا دورہ مکمل کر کے 8 ستمبر کو پاکستان کے لیے روانہ ہوں گے۔ ذرائع کے مطابق صدرِ مملکت منگل کے روز لندن کے لوٹن ایئرپورٹ سے اسلام آباد کے لیے روانہ ہوں گے۔ اس سلسلے میں ان کا خاص جیٹ طیارہ تکنیکی معاونت کے لیے لوٹن ایئرپورٹ سے پیرس روانہ کیا گیا تھا، جو ضروری تکنیکی کام کے بعد آج ہی واپس لوٹن ایئرپورٹ پہنچ جائے گا۔

ذرائع کا مزید کہنا ہے کہ صدر زرداری کو فرانس میں دو روز قیام کرنا تھا، تاہم پیش آمدہ صورتحال اور مصروفیت کے باعث ان کا دورہ فرانس منسوخ کر دیا گیا ہے۔ حکومتی و سفارتی ذرائع کے مطابق صدر مملکت کی وطن واپس آمد کے تمام تر انتظامات مکمل کر لیے گئے ہیں اور وہ منگل کے روز لوٹن ایئرپورٹ سے براہِ راست اسلام آباد کے لیے پرواز کریں گے۔